|
मध्य - हार्बर रेल्वेवर ‘मेगा ब्लॉक’
|
|
|
 |
 |
प्रतिनिधी
मुंबई
उपनगरी रेल्वेवर अभियांत्रिकी कामासाठी रविवारी करण्यात येणारा ब्लॉक यावेळी पश्चिम रेल्वेवर नसून केवळ मध्य रेल्वेच्या ठाणे-कल्याण दरम्यान आणि हार्बर रेल्वेवर मेगा ब्लॉक करण्यात येणार आहे.
मध्य रेल्वेच्या ठाणे आणि कल्याण दरम्यान जलद मार्गावर सकाळी ११ ते दुपारी ३ वाजेपर्यंत ब्लॉक करण्यात येणार असून या काळात सर्व वाहतूक धीम्या मार्गावर वळविण्यात येणार आहे. त्यामुळे कल्याणच्या दिशेने जाणाऱ्या उपनगरी गाडय़ा सर्व स्थानकांवर थांबतील.
हार्बर मार्गावर छत्रपती शिवाजी टर्मिनस ते कुर्ला दरम्यान डाऊन दिशेने आणि वडाळा ते माहीम दोन्ही दिशेने सकाळी ११.१० ते दुपारी ३.१० या वेळेत मेगा ब्लॉक करण्यात येणार आहे. या काळात पनवेल, बेलापूर, वाशीच्या दिशेने जाणाऱ्या हार्बर मार्गावरील गाडय़ा मेन लाइनच्या जलद मार्गावरून चालविण्यात येणार असून त्या करीरोड आणि चिंचपोकळी या स्थानकांवर थांबणार नाहीत.
वडाळा आणि माहीम दरम्यान दोन्ही मार्गावर ब्लॉक करण्यात येणार असल्यामुळे या मार्गावरून प्रवास करणाऱ्या प्रवाशांना सकाळी १० ते सायंकाळी ५ वाजेपर्यंत मेन लाइन तसेच पश्चिम रेल्वेने प्रवास करण्याची परवानगी देण्यात आली आहे. |
