ग्रामस्वच्छतेचा विनोदाच्या अंगाने प्रचार Print

सुनील नांदगांवकर - शनिवार, ४ फेब्रुवारी २०१२
This e-mail address is being protected from spambots. You need JavaScript enabled to view it
altमराठी चित्रपटांतील विनोदाची परंपरा, त्यात काळानुरूप झालेले बदल, फार्सिकल, प्रासंगिक अंगाने विनोदनिर्मिती करण्याचा प्रयत्न अनेक चित्रपटांतून झाला आहे. परंतु प्रथमच ‘येडय़ांची जत्रा’ या चित्रपटांतून विनोदाचा आधार घेऊन ग्रामस्वच्छतेचा विषय दिग्दर्शक मिलिंद कवडे यांनी चांगल्या प्रकारे हाताळला आहे. गावातील समस्त अशिक्षित आणि गावंढळ लोकांच्या मूर्खपणातून घडणारा विनोद हे या चित्रपटाचे वैशिष्टय़ आहे. मुद्दाम ओढूनताणून विनोदनिर्मिती करण्यापेक्षा व्यक्तिरेखांच्या विचित्र वागण्यातून, तिरपागडा विचार करण्याच्या मनोवृत्तीमुळे सहजपणे विनोदनिर्मिती करण्याचा प्रयत्न दिग्दर्शकाने केला असून काही प्रमाणात तो यशस्वी झाला. प्रेक्षकांची निखळ हसवणूक चित्रपट करतो.
मराठवाडय़ातील गाढवेवाडी नामक छोटय़ा खेडय़ात खालची वाडी आणि वरची वाडी असे दोन भाग आहेत. दोन्ही वाडीतील लोकांचे दोन म्होरके म्हणजे कडूअण्णा (विनय आपटे) आणि भानगडे पाटील (मोहन जोशी) हे एकमेकांचे कट्टर विरोधक. त्यामुळे अर्थातच दोघांच्यात प्रचंड स्पर्धा असते. दोन्ही वाडय़ांच्या वेशीवरच नेमकी दुतोंडय़ा मारुतीची मूर्ती सापडते आणि मग त्यावर हक्क सांगण्यावरून दोन्ही वाडय़ांमध्ये तट पडतात ते कायमचे. altदोन वाडय़ांचे दोन म्होरके आणि त्यांचे समर्थक यांच्यात स्पर्धा कायम सुरू राहते. नेमके दोन्ही गावांच्या वेशीवर असलेल्या भागात हरिश्चंद्र ऊर्फ हाऱ्या (भरत जाधव) याचे शेत येते. त्यामुळे त्या शेतावर दोन्ही म्होरके  हक्क सांगण्यासाठी शेताची हागणदारी करतात. गावाच्या दोन्ही वाडीतील लोक हागणदारी म्हणून वापर करतात आणि तीन एक बागायती शेतीचे नुकसान होते. यापासून शेत वाचविण्यासाठी हाऱ्या अनेक उपाय करतो. अखेरीस निर्मल ग्राम स्वच्छता या सरकारी योजनेचा पाठपुरावा करून कायमचा इलाज करण्याचा प्रयत्न करतो. त्या प्रयत्नांत गावातील समस्त गावंढळ, अशिक्षित लोकांच्या यडपटपणामुळे ज्या काही गमतीजमती घडतात त्यावर सबंध चित्रपट बेतलेला आहे.
भानगडे पाटील (मोहन जोशी), कडूअण्णा (विनय आपटे), कडूअण्णाची बायको नयनतारा (विशाखा सुभेदार), कडूअण्णाचा तिरळ्या डोळ्यांचा मुलगा नयनराव (पंढरीनाथ कांबळी), भानगडे पाटलाची कन्या संगी (स्नेहा कुलकर्णी), दामूअण्णा (किशोर नांदलस्कर), कांता (आरती सोळंकी), कांताचा दारूडा नवरा, हाऱ्याचा खास मित्र वस्तऱ्या (संदीप पाठक) अशा एकाहून एक व्यक्तिरेखा म्हणजे खरोखरीच येडय़ांची संख्या प्रचंड असलेल्या या चित्रपटात या सगळ्या व्यक्तिरेखा, त्यांचे विशेष, भूमिकांसाठी केलेली कलावंतांची निवड यामुळे चित्रपट प्रभावी ठरतो.
टीव्ही मालिकेतील अभिनेत्री स्नेहा कुलकर्णीचा या चित्रपटातील अभिनय चांगला झाला आहे. पंढरीनाथ कांबळी, विशाखा सुभेदार व अन्य सगळ्याच कलावंतांनी आपापल्या व्यक्तिेरखांना न्याय दिला आहे. चित्रपटाचे छायालेखन आणि संकलन हे चित्रपटाचे बलस्थान आहे. सहजपणे विनोदनिर्मिती करण्याचा प्रयत्न दिग्दर्शकाला जमला आहे. प्रेक्षकाची निखळ हसवणूक चित्रपट नक्कीच करतो.
येडय़ांची जत्रा
निर्माता - विश्वजीत गायकवाड
लेखक-दिग्दर्शक - मिलिंद कवडे
संवाद - प्रकाश भागवत
छायालेखन - समला भास्कर
संकलन - विजय खोचीकर
संगीत - क्षितिज वाघ
कलावंत - भरत जाधव, संदीप पाठक, मोहन जोशी, स्नेहा कुलकर्णी, विनय आपटे, विशाखा सुभेदार, पंढरीनाथ कांबळी, सुहास भालेकर, निशा परुळेकर, आरती सोळंकी, आनंदा कारेकर, जयराज नायकर, गणेश मयेकर, सतीश तारे, किशोर नांदलस्कर, जयंत सावरकर, मनोज टाकणे, अंजली उजवणे, वासू भागवत, श्वेता तिवारी व अन्य.