संक्षिप्त : ला लिगा फुटबॉल : रिअल माद्रिदचा दिमाखदार विजय Print

माद्रिद : गोन्झालो हिग्वेन आणि ख्रिस्तियानो रोनाल्डो यांच्या प्रत्येकी दोन गोलांच्या जोरावर रिअल माद्रिदने मार्लोकावर ५-० असा शानदार विजय मिळवला. रोनाल्डोनो सलग आठव्या सामन्यामध्ये गोल झळकावण्याची किमया केली.  हिग्वेनने आठव्या मिनिटाला गोल करत दणक्यात सुरुवात केली. रोनाल्डोने २२व्या मिनिटाला गोल करत रिअलची आघाडी वाढवली.

यानंतर बऱ्याच कालावधीसाठी रिअलला गोलसाठी प्रतीक्षा करावी लागली. ७०व्या मिनिटाला हिग्वेनने पुन्हा एकदा गोल केला. लगेचच रोनाल्डोनेही आपले कौशल्य दाखवत रिअलची आघाडी भक्कम केली.     

सरस्वती स्पोर्ट्स क्लब, श्रीसमर्थची विजयी आगेकूच
मुंबई : यूआरएल फाऊंडेशन आयोजित पुरुष-महिला खुला गट मुंबई जिल्हा अजिंक्यपद आणि निवड चाचणी खो-खो स्पर्धेत सरस्वती स्पोर्ट्स क्लब आणि श्रीसमर्थने विजयी आगेकूच केली. पुरुषांच्या गटाच्या अटीतटीच्या सामन्यात सरस्वती स्पोर्ट्स क्लबने अमर हिंदवर १४-१३ असा एका गुणाने विजय मिळवला. मध्यंतराला सरस्वतीने अमरहिंदवर ७-६ अशी घेतलेली एका गुणाची आघाडी निर्णायक ठरली. कुशल शिंदे, श्रीकांत वल्लाकाठी, प्रवीण जाधव आणि मनीष पगार यांनी अप्रतिम खेळ करत हा विजय साकारला. दुसऱ्या सामन्यात श्रीसमर्थ व्यायाम मंदिराने श्री स्पोर्ट्स क्लबवर १२-८ असा एक डाव आणि ४ गुणांनी पराभव केला. विराज कोठमकर, प्रणय मयेकर, साकेत जेस्ते आणि तेजस शिरसकर हे या विजयात चमकले.    

श्री सह्याद्री, दत्तसेवा पुढील फेरीत
मुंबई : मुंबई उपनगर खो-खो संघटनेच्या पुरुष आणि महिला गटाच्या जिल्हा अजिंक्यपद आणि निवड चाचणी स्पर्धेत श्री सह्याद्री संघ भांडुप, परांजपे स्पोर्ट्स क्लब, महात्मा गांधी स्पोर्ट्स अकादमी, दत्तसेवा क्रीडा मंडळ यांनी उपांत्य फेरीत धडक मारली. श्री सह्याद्री संघाने यजमान प्रबोधन क्रीडाभवनचा १४-१३ असा एका गुणाने पराभव केला. सह्याद्रीतर्फे नचिकेत जाधवने ४ गडी टिपले. अन्य लढतींमध्ये महात्मा गांधी स्पोर्ट्स अकादमीच्या अ संघाने स्वराज्य प्रतिष्ठानचा तर परांजपे स्पोर्ट्स क्लबने गोयंका एज्युकेशन ट्रस्टवर मात करत पुढच्या फेरीत वाटचाल केली. महिला गटात सह्याद्री क्रीडा मंडळाने गोयंका एज्युकेशनल ट्रस्टचा एक डाव आणि २ गुणांनी पराभव केला. अनुभवी खेळाडू शिल्पा जाधव सह्याद्रीच्या विजयात चमकली. दत्तसेवा क्रीडा मंडळाने महात्मा गांधी स्पोर्ट्स अकादमी ब संघाला ७ गुणांनी नमवले.     

लंगडी : महाराष्ट्राला दुहेरी मुकुट
पुणे : लंगडी असोसिएशन ऑफ महाराष्ट्रतर्फे घेण्यात आलेल्या १४ वर्षांखालील तिसऱ्या सबज्युनिअर राष्ट्रीय लंगडी अजिंक्यपद स्पर्धेत महाराष्ट्राने पुरुष आणि महिला दोन्ही गटांत जेतेपदावर नाव कोरले. मुलींच्या गटात महाराष्ट्राने दादरा नगर हवेली संघावर ३६ विरुद्ध ३४ असा २ गुणांनी मात केली. मधुरा पेडणेकर, सिद्धी हरमळकर, मयूरी लोमटे आणि शिवानी गडकरी यांनी सुरेख खेळ करत हा विजय साकारला. मुलांच्या गटात महाराष्ट्राने गोव्याला ३० विरुद्ध २८ असे ५ मिनिटे आणि २ गुणांनी नमवले. यशराज मोरेच्या अप्रतिम खेळाला हिमांशू काळे आणि शुभम गीते यांची उत्तम साथ मिळाली.

मुंबई उपनगर खो-खो : सह्य़ाद्री अंतिम फेरीत
मुंबई : मुंबई उपनगर खो खो संघटना आयोजित पुरुष-महिला जिल्हा अजिंक्यपद व निवड चाचणी खो खो स्पर्धेत महिला गटात गतविजेत्या सह्य़ाद्री क्रीडा मंडळ, चेंबूर व परांजपे स्पोर्ट्स क्लब तसेच पुरुष विभागात सह्य़ाद्री क्रीडा मंडळ चेंबूर व श्री सह्य़ाद्री संघ भांडुप यांनी अंतिम फेरीत प्रवेश केला. महिला गटातील उपान्त्य फेरीच्या पहिल्या सामन्यात सह्य़ाद्री क्रीडा मंडळाने दत्त सेवा क्रीडा मंडळाचा (७-५, ७-५) असा ४ गुणांनी पराभव केला. महिला गटातील दुसऱ्या उपान्त्य फेरीच्या सामन्यात परांजपे स्पोर्ट्स क्लबने महात्मा गांधी स्पोर्ट्स अ‍ॅकॅडमीचा (७-५, ७-४) असा ५ गुणांनी पराभव केला. पुरुषांच्या पहिल्या उपान्त्य फेरीच्या सामन्यात सह्य़ाद्री क्रीडा मंडळ चेंबूरने परांजपे स्पोर्ट्स क्लबचा (१३-९, ८-९) असा ५ गुणांनी पराभव केला. पुरुष गटातील दुसऱ्या उपान्त्य फेरीच्या सामन्यात गतविजेत्या श्री सह्य़ाद्री संघ भांडुपने महात्मा गांधी स्पोर्ट्स अ‍ॅकॅडमीचे कडवे आव्हान ९-७, ९-६ असे ५ गुणांनी मोडून काढले.    

निवड चाचणी खो खो : श्री समर्थ उपांत्य फेरीत
मुंबई : यू.आर.एल. फाऊंडेशन आयोजित खुला गट मुंबई जिल्हा अजिंक्यपद व निवड चाचणी खो खो स्पर्धेत झालेल्या अटीतटीच्या लढतीत सरस्वती स्पोर्ट्स क्लबने विजय क्लब, दादरच्या संघाला २१ वि. १५ असे ६ गुणांनी पराभूत करून उपान्त्य फेरी गाठली. दुसरी अटीतटीची झाली ती विद्यार्थी क्रीडा केंद्र, परळ व युवक क्रीडा केंद्र, परळ यांच्यामध्ये. या लढतीत १८ विरुद्ध १४ अशी ४ गुणांनी विद्यार्थीच्या संघाने सरशी मिळवली.महिलांमध्ये सरस्वती स्पोर्ट्स क्लब व अमर हिंद मंडळात चांगलीच लढत झाली. सरस्वतीने अमर हिंदचा (९-६-५-३) १४ विरुद्ध ९ असा ५ गुणांनी पराभव केला.    
कॅरम : मोहम्मद, आयेशा अजिंक्य
मुंबई : कॅरम प्लेयर्स वेल्फेअर्स असोसिएशन आणि क्षात्रक्य समाज यांच्यातर्फे आयोजित मुख्तार अहमद स्मृतीचषक कॅरम स्पर्धेत पुरुषांमध्ये मोहम्मद साजिद तर महिलांमध्ये आयेशा मोहम्मदने जेतेपदावर नाव कोरले. पुरुष गटाच्या रंगतदार लढतीत मोहम्मद साजिदने मुंबईच्याच अशोक गौरला २५-८, २५-९ असे नमवत जेतेपदावर कब्जा केला. महिलांमध्ये आयेशा मोहम्मदने अग्रमानांकित राज्यविजेत्या संगीता चांदोरकरचा २५-१९, २५-१८ असा पराभव करत जेतेपद पटकावले. कुमार गटात विशाल परमारने दीप जोशीवर २५-१६, २५-१८ अशी मात करत जेतेपदावर नाव कोरले. कुमारी गटात मैत्रेयी गोगटेने राधिका जोशीवर २५-०, १०-२५, २५-१४ असा विजय मिळवत जेतेपदावर शिक्कामोर्तब केला.