ऑटो न्यूज Print

गुरुवार, १ नोव्हेंबर २०१२
अमेरिकेतही धावणार नॅनो

टाटांची नॅनो लवकरच अमेरिकी बाजारपेठेत दाखल होणार असून त्यासाठी या गाडीत अनेक बदल केले जात आहेत. अमेरिकेतील बाजारपेठ फार वेगळी आहे. त्यामुळे तेथे नॅनो सादर करताना त्यात बदल करणे अपरिहार्य आहे असे रतन टाटा यांनी अलिकडेच सांगितले. तेथे ५.२७ लाखांच्या मर्यादेत (१० हजार डॉलर) नॅनो सादर केली जाईल. सध्याची नॅनो अंडाकार असून भारतातील मध्यमवर्गीयांची दुचाकी वाहनांवर चार-चार जण बसून होणारी परवड थांबवण्यासाठी ती तयार केली होती. २००९ मध्ये तिची भारतातील किंमत २५०० डॉलर म्हणजे १.३१ लाख होती. ती जगातली स्वस्त मोटार म्हणून प्रसिद्ध आहे. अमेरिकेत स्पर्धा करण्यासाठी नॅनोला तेथील निकषांचे पालन करावे लागणार असून त्यात पॉवर स्टिअरिंग व ट्रॅक्शन कंट्रोल या सुविधा द्याव्या लागतील. अमेरिकेत नॅनोची किंमत ४.२१ लाख म्हणजे ८००० डॉलर असेल. मेक्सिकोच्या निस्सान कंपनीच्या व्हर्सा गाडीची किंमत सध्या ११,७५० डॉलर म्हणजे ६.१९ लाख रुपये आहे. तिच्याशी नॅनो कशी टक्कर देते हे पाहणे उत्सुकतापूर्ण ठरणार आहे. नॅनोची नवी आवृत्ती मोठे इंजिन व इतर सुविधांसह येणार असून नॅनो गाडी युरोपात पाठवतानाही त्यात वेगळे बदल करावे लागतील असे टाटा यांनी सांगितले. टाटा मोटर्सने २०११-१२ मध्ये ३१ अब्ज डॉलर म्हणजे १६५,६५४ कोटी रुपयांचा महसूल मिळवला आहे. टाटा मोटर्सच्या सहकारी कंपन्या ब्रिटन, दक्षिण कोरिया, थायलंड, स्पेन व दक्षिण आफ्रिकेत आहेत.

फोर्सची ट्रॅव्हलर-२६
alt
फोर्स मोटरच्या ट्रॅव्हलर-२६ चे राजस्थानमध्ये बुधवारी अनावरण करण्यात आले. २६ सीटरच्या मीडी बस प्रकारातील अत्याधुनिक प्रणाली असलेली ही पहिली बस असल्याचा दावा कंपनीने केला आहे. या बसच्या चाकांसाठी वापरण्यात आलेल्या यंत्रणेमुळे मर्यादित वेग असतानाही बसचा प्रवास आरामदायी होणार आहे. पुढल्या वर्षी म्हणजेच मार्च २०१३ पर्यंत एक हजार बस विकण्याचे उद्दिष्ट कंपनीने ठेवले असून त्याच्या पुढल्या वर्षी चार हजार ५०० बस विकण्याचे उद्दिष्ट आहे. देशभरात कंपनीचे १७३ विक्रेते असून ४६ सव्‍‌र्हिस सेंटर आहेत. तर लवकरच विक्रेत्यांची संख्या २२३ आणि सव्‍‌र्हिस सेंटरची संख्या ६५ होणार आहे.

ऑटोकार परफॉर्मन्स शो
alt
दसरा-दिवाळी म्हणजे खरेदीचा धमाका.. याच दिवसांत तर नवनवीन वस्तूंची खरेदी करण्यासाठी ग्राहकाराजा सज्ज असतो. त्यातल्या त्यात गाडय़ा घेण्याकडे तर ग्राहकांचा मोठा ओढा असतो. त्यामुळेच तर कार आणि बाइक निर्माता कंपन्या या सणांकडे डोळे लावून बसलेले असतात. जाहिरातींचा भडिमार, आकर्षक कर्जयोजना, भेटवस्तू, सूट याचा धुमधडाकाही ग्राहकांना आपल्याकडे आकर्षित करण्यासाठी केला जातो. या सर्व पाश्र्वभूमीवर मुंबईत आजपासून सुरू होत आहे ‘ऑटोकार परफॉर्मन्स शो’ म्हणजे या शोमध्ये तुम्हाला जगातील सर्व नवनवीन कार व बाइक्स पहायला मिळणार आहेत. त्याचबरोबर या गाडय़ांमध्ये वापरले जाणारे नवनवीन गॅजेट्सची माहितीही उपलब्ध होणार आहे. वांद्रे-कुर्ला कॉम्प्लेक्सच्या एमएमआरडीए ग्राऊंडवर सुरू होत असलेला शो ४ नोव्हेंबपर्यंत चालणार आहे. या शोमध्ये मर्सिडीज, पोर्शे, व्होल्वो, ऑडी आणि जग्वार या नामवंत कंपन्यांच्या गाडय़ा पहायला आणि टेस्ट ड्राइव्हसाठी उपलब्ध असतील तसेच स्कोडा, फोक्सव्ॉगन, फोर्ड, टोयोटा, निस्सान, महिंद्रा आणि महिंद्रा, ह्य़ुंडाई व रेनॉ या गाडय़ाही चालवण्याची संधी उपलब्ध होणार आहे. तसेच सुपरकार गॅलरी हा नवीन सेक्शनही या ठिकाणी उपलब्ध असेल. भविष्यातील कार कशा असतील याचे चित्र या ठिकाणी रंगवण्यात आलेले असेल. थोडक्यात चार दिवस एमएमआरडीए ग्राऊंडवर व्रूम व्रूमची धूम असेल. शोला भेट देण्यासाठी १५० रुपये प्रवेश शुल्क आकारण्यात येणार आहे.

थंडरबर्डची दोन नवीन मॉडेल सादर
alt
बंगळुरू - चेन्नई येथील रॉयल एनफिल्ड कंपनीचा दुसरा प्रकल्प चेन्नई नजीक ओरगाडाम येथे २०१३ मध्ये सुरू होत असून त्यानंतर बुलेट मोटरसायकलसाठीचा प्रतीक्षा कालावधी सहा ते आठ महिने इतका खाली येईल असे सांगण्यात आले आहे. नवीन प्रकल्पात दीड लाख बुलेट दरवर्षी तयार केल्या जाणार असल्याची माहिती रॉयल एनफिल्डचे मुख्य कार्यकारी अधिकारी  वेंकी पद्मनाभन यांनी दिली. रॉयल एनफिल्ड बुलेटच्या थंडरबर्ड प्रकारातील दोन मॉडेल ५०० सीसी व ३५० सीसी गटात सादर करण्यात आले. कंपनीचे वरिष्ठ उपाध्यक्ष शाजी कोशी यांनी सांगितले, की कर्नाटकात या बुलेट गाडय़ांना जास्त मागणी आहे. २०१० च्या तुलनेत २०११ मध्ये या गाडय़ांचा खप ८० टक्क्य़ांनी वाढला. या वर्षी खपात २०११ च्या तुलनेत ७० टक्के वाढ झाली आहे. कर्नाटकात त्यासाठी १६ वितरक नेमले आहेत. आतापर्यंत ७५ हजार बाइक विकल्या गेल्या असून या आर्थिक वर्षांत एक लाख गाडय़ा विकण्याचा इरादा आहे. पूरक साधनाच्या बाजारपेठेत कंपनी उतरली असून त्यात लेदर, नायलॉन जॅकेट, हेल्मेट व ग्लोव्हज या साधनांचा समावेश आहे. नवीन थंडरबर्ड बुलेटची किंमत ५०० सीसीला रु. १,८६,६२२ इतकी आहे तर ३५० सीसी गटात ती रु. १,४६,४६६ इतकी आहे. अमेरिका हे रॉयल एनफिल्डची मोठी बाजारपेठ आहे. ऑस्ट्रेलिया, युरोप, लॅटिन अमेरिकेतही या गाडय़ा लोकप्रिय आहेत. त्यामुळे या देशात त्यांची निर्यात केली जाते. थंडरबर्डचे पहिले मॉडेल २००२ मध्ये सुरू करण्यात आले त्यानंतर ३५० सीसी गटात महिन्याला १००० गाडय़ा विकल्या गेल्या, असे पद्मनाभन यांनी सांगितले.