मुलाखत : म्युच्युअल फंड : संधींचा समान अवकाश.. Print

सचिन रोहेकर, सोमवार, २९ ऑक्टोबर २०१२
This e-mail address is being protected from spambots. You need JavaScript enabled to view it

रिझव्‍‌र्ह बँकेचे समाधान होईल असा चलनफुगवटय़ाचा पाच टक्क्यांचा दर दिसायला पुढच्या वर्षी एप्रिलपर्यंत प्रतीक्षा करावी लागेल, तोवरच्या सहा महिन्यात फार तर एकदा रेपो दर कपात शक्य दिसते. तथापि सीआरआर कपात मात्र शक्य असून, ती देखील सुखद परिणाम साधणारीच असेल, असा यूटीआय म्युच्युअल फंडाचे वरिष्ठ उपाध्यक्ष आणि फंड व्यवस्थापक  ललित नांबियार यांचा कयास आहे. सोबतच्या विस्तृत मुलाखतीत शेअर बाजाराच्या सार्वत्रिकीकरणाची निकड स्पष्ट करतानाच, आगामी काळातील बाजाराच्या कलासंबंधीही त्यांनी समर्पक भाष्य केले आहे.-
’   सध्याच्या आर्थिक-राजकीय पाश्र्वभूमीवर आगामी काळात बाजार स्थितीविषयी तुमचे अंदाज काय?
- अलिकडच्या काळात सरकारकडून महत्त्वपूर्ण धोरणात्मक निर्णयांची घोषणा जरूर झाली आहे, पण सध्या तरी त्या केवळ घोषणाच आहेत. त्यांची अंमलबजावणी आणि इच्छित परिणाम दिसून येण्यास आणखी काही काळ जावा लागेल. जोवर गुंतवणुकीचे चक्र पुनरूज्जीवित झाल्याचे दिसून येत नाही, तोवर बाजाराचा स्पष्ट कल दिसून येणेही शक्य नाही. तोपर्यंत छोटय़ा छोटय़ा मर्यादेत निर्देशांकातील हिंदोळे अपरिहार्य आहेत.
’  अशा स्थितीत एक म्युच्युअल फंड म्हणून गुंतवणुकीसाठी कोणत्या उद्योगक्षेत्राचे पारडे जड आहे आणि कोणत्या क्षेत्रात गुंतवणूक तुम्ही टाळाल?
- व्याजदर वाढीचे आवर्तन कळसबिंदूला पोहचले आहे आणि यापुढे आणखी व्याजाचे दर वाढणार नाहीत हे निश्चितच. त्याचप्रमाणे उत्तरोत्तर रोख-तरलता वाढीला लागली आहे.  त्यामुळे उत्तम पत गुणवत्ता असलेल्या बँका व्याजाचे दर उतरणीला लागल्याच्या स्थितीत गुंतवणुकीसाठी सर्वोत्तम ठरतात. जोवर उद्योगक्षेत्रातून सार्वत्रिक गुंतवणुकीला बहर येत नाही तोवर उपभोग सर्वाधिक असलेल्या क्षेत्रांवर आमचे लक्ष राहील.
’  सध्याच्या तिमाही निकालांच्या हंगामाबाबत तुमचा अभिप्राय काय? त्यात स्थावर मालमत्ता क्षेत्राची कामगिरी खरेच सुखद आश्चर्याचा धक्का म्हणता येईल काय?
- माझ्या मते, जुलै-सप्टेंबर २०१२ तिमाही निकालांचा हंगाम हा सामान्य स्वरूपाचाच आहे. दणकेबाज निकाल येतील अशी अपेक्षा नव्हती. स्थावर मालमत्ता क्षेत्राबाबत जे म्हटले जात आहे ते पुरते खरे नाही. त्या निकालांमध्ये विलक्षण काही आहे असे वाटत नाही.
’  रोडावलेला अर्थविकास आणि चलनफुगवटय़ाचा चिंताजनक स्तर या पाश्र्वभूमीवर रिझव्‍‌र्ह बँकेकडून परवा काय केले जाईल असे वाटते?
- ग्राहक किंमत निर्देशांक अर्थात महागाईच्या दराचा वाढता क्रम हा डिसेंबरअखेपर्यंत सुरूच राहील. रिझव्‍‌र्ह बँकेच्या दृष्टीने चलनफुगवटा दराची पाच टक्क्यांची समाधानकारक पातळी ही पुढल्या वर्षी एप्रिलनंतरच पाहता येऊ शकेल. म्हणजे तो पर्यंतच्या सहा महिन्यात फार तर एकदा रेपो दर कपात दिसेल, अन्यथा रोख राखीव प्रमाण (सीआरआर) कपातीवरच समाधान मानावे लागेल. तथापि सीआरआर कपातीतूनही रेपो दर कपातीइतका सुपरिणाम दिसून येईल. कारण बँकांकडील रोकडसुलभता वाढल्याने व्याजाचे दर खाली आणण्यास त्यांना चालनाच मिळेल.
’  सप्टेंबरमधील वेगवान एकतर्फी वाढ पाहता आपला शेअर बाजार जागतिक घडामोडींबाबत असंवेदनशील बनला आहे असे म्हणता येईल काय? आगामी काळात परिणामकारक ठरतील असा महत्त्वाचा  जागतिक घटनाक्रम काय असेल?
- पारंपरिकरीत्या विदेशी वित्तसंस्थांकडून येणारा पैसा हीच आपल्या बाजाराची चालकशक्ती राहिली आहे. त्यामुळे जागतिक घटनाक्रम आपल्या बाजाराकडून बेदखल ठरला आहे, हे कदापि म्हणता येणार नाही. सप्टेंबर महिना जागतिक शेअर बाजाराच्या दृष्टीने सकारात्मक राहिला तर ऑक्टोबरमध्ये जागतिक आघाडीवर फारसा घटनाक्रम नव्हताच. येत्या काळात स्पॅनिश रोख्यांचा परतावा दर, तसेच अमेरिकी राष्ट्राध्यक्ष निवडणुकीचा निकाल भांडवली बाजाराच्या दृष्टीने कळीचा ठरेल. इराणमधील भू-राजकीय स्थिती जागतिक क्रूडतेलाच्या किमतीच्या दृष्टीने महत्त्वाच्या ठरतील.  
’  आर्थिक सुधारणांबाबत सरकारच्या धडाडीने बाजार भावना प्रबळ बनल्या  हे जरी खरे असले तरी भारतात शेअर बाजार  अजूनही काही मूठभरांचाच प्रांत राहिला आहे, त्याच्या सार्वत्रिकीकरणाच्या दृष्टीने काय केले जायला हवे ?
- होय, दुर्दैवाने आपल्या बाजाराला आवश्यक ती खोली प्राप्त करता आलेली नाही. इंटरनेटचा प्रसार आणि वाढत्या उत्पन्नस्तराच्या बरोबरीने शेअर बाजारातील सहभाग धीम्या गतीने वाढत आहे. मा आहे. छोटे गुंतवणूकदार मोठय़ा संख्येने यायचे झाल्यास सोपी, पारदर्शी प्रक्रिया आणि न्यायोचित नियम-कानूंची नितांत आवश्यकता  आहे. सर्वाना संधींचा समान अवकाश मिळायला हवा, तो जितका मक्तेदार ‘एफआयआय’ना, तितकाच देशी म्युच्युअल फंडांना मिळायला हवा. शेअर बाजारातील गुंतवणुकीला जर चक्रवाढीचे परिमाण लावले तर दीर्घ मुदतीत मोठी पूंजी निश्चितच उभारता येते. म्हणूनच गुंतवणूक ही दीर्घमुदतीचा विचार करूनच करायला हवी. अन्यथा नवख्या गुंतवणूकदारांना म्युच्युअल फंडांच्या ‘एसआयपी’चा पर्याय उपलब्ध आहेच.